«Комо» клубининг марказий ҳимоячиси Хакобо Рамон Англия Премьер-лигаси грандлари эътиборига тушди. 21 ёшли футболчининг ўйинларини Лондоннинг «Арсенал» ва «Челси» клублари скаутлари бевосита кузатиб боришмоқда. Бу ҳақда таниқли журналист Экрем Конур хабар бермоқда.

Сеск Фабрегас қўл остида тўп сураётган испаниялик футболчининг трансфери бошқа клублар учун бироз мураккаб кечиши мумкин. Гап шундаки, Мадриднинг «Реал» клуби ўз тарбияланувчисини биринчи навбатда қайта сотиб олиш ҳуқуқига эга. Бундан ташқари, «қироллик клуби» футболчининг кейинги сотувидан тушадиган маблағнинг 50 фоизини қўлга киритади.

Ҳозирда «Комо» Хакобо Рамоннинг трансфер нархини 45-50 миллион еврога баҳоламоқда. Жорий мавсумда ҳимоячи Италия жамоаси сафида барча мусобақаларда 35 та учрашувда майдонга тушиб, рақиблар дарвозасини 2 бор ишғол қилишга муваффақ бўлди.