«Реал» бош мураббийи Альваро Арбелоа Ла Лига доирасидаги «Реал Овьедо»га қарши ўйин олдидан журналистлар саволларига жавоб берди.

— Бу мавсумда «Реал» ўз тарихидаги энг паст нуқтага тушди деб ҳисоблайсизми?

«Бу савол мени ҳайрон қолдирмоқда. Унда бошқа клублар ҳақида нима дейиш мумкин? Ахир биз 50 йилдан бери совринсиз юрганимиз йўқ. «Реал» доимо юқори талабчанлик ва кўпроғига интилиш туфайли ўз мавқеини сақлаб келган. Бу ерда кимдир «Реал» кейинги мавсумда ҳам ҳеч нарса юта олмайди деб айтишга ботинмайди деб ўйлайман.

Мен клубдаги ёки кийиниш хонасидаги беқарорлик ҳақидаги гапларни тушунмаяпман. «Реал» узоқ вақтдан бери кўп ишларни тўғри амалга ошириб келмоқда: клуб молиявий жиҳатдан барқарор, яхши бошқарилади ва бу ерда буюк футболчилар йиғилган. Ёзда албатта зарур таҳлиллар ўтказилади ва таркиб кучайтирилади. Биз янада кучлироқ «Реал»ни кўрамиз. Аммо бу спорт — ҳар йили Чемпионлар лигаси ёки ички чемпионатда ғалаба қозониш имконсиз», — деди Арбелоа.

Маълумот учун, «Реал» 2025/2026 йилги мавсумни совринсиз якунламоқда.