Туркиянинг «Галатасарой» клуби «Ливерпуль» ҳимоячиси Виргил ван Дейк трансфери амалга ошмай қолган тақдирда бошқа вариантларни кўриб чиқмоқда. Бу ҳақда Goal.com нашри хабар бермоқда.

Маълумотларга кўра, истанбулликлар Мадриднинг «Реал» клуби ҳимоячиси Антонио Рюдигерни ўз сафларига қўшиб олиш ниятида. Германиялик футболчининг амалдаги шартномаси шу ёзда якунига етади. «Қироллик клуби» шартномани узайтиришга тайёр, бироқ бунинг учун Рюдигер маошининг сезиларли даражада камайишига рози бўлиши керак.

33 ёшли ҳимоячига шунингдек «Ювентус» ҳам қизиқиш билдирмоқда. Футболчининг агентлари эса Саудия Арабистони бозоридаги вариантларни ўрганишмоқда.

Сўнгги йилларда «Галатасарой» юлдуз футболчиларни трансфер қилиш борасида фаоллик кўрсатмоқда. Ўтган ёзда клуб Лерой Санени эркин агент сифатида ўз сафига қўшиб олган, шунингдек, Виктор Осимхеннинг трансфери учун 75 миллион евро сарфлаган эди.