Мадриднинг «Реал» клуби президенти Флорентино Перес жамоанинг собиқ бош мураббийи Хаби Алонсонинг истеъфоси ва унинг қўл остидаги муваффақиятсиз давр ҳақида фикр билдирди.

Клуб раҳбарининг таъкидлашича, мутахассиснинг тайинланиши хато бўлмаган, балки ташқи омиллар натижаларга таъсир қилган.

«Мен Хаби Алонсони таклиф қилиб хато қилмагандим. Шунчаки вазият шуни тақозо этди. Бизда тегишли даражада мавсумолди тайёргарлик бўлмади ва бу натижаларда ўз аксини топди», — дея Переснинг сўзларини келтиради El Chiringuito.

Маълумот учун, Алонсо ўтган йилнинг ёзидан жорий йилнинг январига қадар «қироллик клуби»ни бошқарди. Испания Суперкубоги финалида «Барселона»дан қабул қилинган мағлубиятдан сўнг у лавозимидан озод этилган эди.

Муваффақиятсизликнинг асосий сабабларидан бири сифатида мавсумолди тақвимнинг зичлиги кўрилмоқда. Эслатиб ўтамиз, 2025 йилнинг ёзида илк бор янги форматдаги Клублар ўртасидаги жаҳон чемпионати бўлиб ўтган ва у бир ой давом этган эди. Бу эса кўплаб гранд жамоалар қатори «Реал»нинг ҳам тикланиш жараёнига халақит берган.