Миланнинг «Интер» клуби Италия Кубоги финалида «Лацио» устидан 2:0 ҳисобида ғалаба қозониб, бош совринни қўлга киритди. Римдаги «Стадио Олимпико»да кечган баҳс тақдири биринчи бўлимнинг ўзидаёқ ҳал бўлди.

Учрашувнинг 14-дақиқасида римликларнинг автоголи «нерадзурри»ни ҳисобда олдинга олиб чиққан бўлса, 35-дақиқада Лаутаро Мартинес дарвозани ишғол қилиб, якуний ҳисобни ўрнатди.

Жамоа бош мураббийи Кристиан Киву муваффақиятли мавсум ҳақида ўз фикрларини билдириб ўтди.

«Биз ажойиб мавсумни ўтказдик ва иккита совринга лойиқ эдик. Эришилган ютуқлардан ва мухлисларимиз учун хурсандмиз. А Серия ва Италия Кубогидаги ғалабани ҳеч қачон оддий ҳолдек қабул қилмаслик керак», — дейди руминиялик мутахассис Sport Mediaset нашрига берган интервьюсида.

Эслатиб ўтамиз, «Интер» жорий ой бошида Италия чемпионатида ҳам муддатидан олдин чемпионликни расмийлаштирган эди. Бу жамоа учун 2010 йилдан буён илк «олтин дубль» (бир мавсумда ҳам чемпионат, ҳам кубокда зафар қучиш) бўлди.