«Реал Мадрид» келаси мавсум учун таркибни шакллантириш режаларини тузмоқда. Marca нашрининг ёзишича, мадридликлар Эдуардо Камавингани сотилиши мумкин бўлган номзод сифатида кўриб чиқмоқда.
Бироқ франциялик футболчи таслим бўлмоқчи эмас — у «Реал»да қолиш ва асосий таркибдан жой олиш учун курашиш ниятида. Аввалроқ матбуотда 23 ёшли Камавингага Англия Премьер-лигаси клублари қизиқиш билдираётгани ҳақида хабарлар тарқалган эди.
Transfermarkt портали мутахассислари ярим ҳимоячини 50 миллион еврога баҳолашмоқда. Мураккаб кечган мавсумдан сўнг, Камавинга Франция терма жамоасининг Жаҳон чемпионати учун қайдномасига кирмай қолиш хавфи остида турибди.
