Англия Чемпионшипида юзага келган шпионлик можароси янада жиддий тус олмоқда. Аввалроқ Англия футбол лигаси (EFL) плей-офф финали қолдирилиши ёки бутунлай бекор қилиниши мумкинлигини маълум қилган эди.

Гап шундаки, «Саутгемптон»нинг самарадорлик бўйича таҳлилчиси плей-офф ярим финали олдидан «Мидлсбро» машғулотларини яширинча суратга олаётгани ва тактикани ёзиб бораётгани аниқланган.

Шундан кейин икки ўйин натижасига кўра «Саутгемптон» «Мидлсбро»ни мағлуб этиб (0:0, 2:1), финалга чиққан эди. Жамоа 23 май куни АПЛ йўлланмаси учун «Халл»га қарши майдонга тушиши керак.

Бироқ «Мидлсбро» клуби расман «Саутгемптон»ни шпионлик ва машғулот жараёнини ноқонуний тасвирга олишда айблади. Қоидаларга кўра, айбланаётган клуб жавоб бериш учун 14 кун вақтга эга.

Шу билан бирга, EFL ишни тезлаштиришни истамоқда. Чунки агар финал кўчирилса, «Уэмбли» стадионида май ойи охири ва июнь бошида тадбирлар жадвали жуда зич экани муаммо туғдириши мумкин.

Маълум бўлишича, интизом қўмитаси «Мидлсбро»га тергов жараёнида иштирок этишга рухсат бермаган.

Шундан сўнг «Мидлсбро» расмий баёнот билан чиқди:

“Клуб ушбу қарордан афсусда. Чунки айнан биз кўриб чиқилаётган масалалардан бевосита жабр кўрганмиз ва воқеалар ҳамда уларнинг спорт натижасига таъсири бўйича далилларга эгамиз.

Машғулотимизни кузатиш ва видеога олиш каби ҳаракатлар спорт ҳалоллиги ва адолатли рақобат тамойилларига зид.

Бундай вазиятда ягона муносиб чора — «Саутгемптон»ни Чемпионшип плей-офф финалидан четлатишдир”, — дейилади клуб баёнотида.

Агар «Мидлсбро» талаби қондирилиб, финал бекор қилинса, АПЛ йўлланмаси автоматик равишда «Халл»га берилиши мумкин. «Халл» Чемпионшип мунтазам мавсумини олтинчи ўринда якунлаган эди.