«Барселона» ярим ҳимоячиси Фермин Лопес «кўк-анорранглилар»нинг Мадриднинг «Реал» клубига қарши баҳслардаги муваффақиятлари ҳақида фикр билдирди. Каталония клуби сўнгги саккизта «Эл-Класико»нинг еттитасида ғалаба қозонишга муваффақ бўлди.
«Бу биз учун жуда катта аҳамиятга эга. Биз болалигимизданоқ "Барселона"га мухлислик қиламиз. Академия битирувчилари "Барса" руҳияти билан улғайишган. Совринлар ютиш одамга завқ бағишлайди, аммо "Реал" устидан қозонилган ғалабалар — бу буткул бўлакча туйғу», — дея испаниялик ярим ҳимоячининг сўзларини келтирмоқда Marca газетаси.
Эслатиб ўтамиз, 10 май куни «Барселона» ўз уйи — «Камп Ноу» стадионида «қироллик клуби»ни қабул қилган эди. Ханс-Дитер Флик шогирдлари принципиал рақибни 2:0 ҳисобида мағлуб этишди. Ушбу ғалаба эвазига «кўк-анорранглилар» муддатидан олдин Испания чемпионлигини қўлга киритишди.
