«Манчестер Сити» бош мураббийи Хосеп Гвардиола Англия Кубоги финали арафасида жамоанинг сўнгги 10 йил ичида қўлга киритган совринлари сонини ҳисоблаб чиқди. «Шаҳарликлар» шу пайтгача 19 та совринни қўлга киритишган ва ҳозир 20-сини ютишлари мумкин. Бундай ҳолатда, «Сити» ўртача ҳисобда бир мавсумда иккитадан совринга эга чиққан бўлади.

«Хўш, 10 йил ичида 19 та титул — бу ёмон эмас… Улар менинг кетишимни кутишлари шарт эмас, чунки ҳаммаси жуда мароқли бўлганини ўзлари ҳам билишади! Бу ҳақиқатан ҳам даҳшатли даражада қизиқ бўлди! 20-соврин учун курашиш… ёмон эмас!» — дея испаниялик мутахассиснинг сўзларини келтирмоқда Фабрицио Романо.

«Сити» Чемпионлар лигасини тарк этган бўлса-да, АПЛда ғолиб чиқиш имкониятларини ҳануз сақлаб турибди. «Челси»га қарши финал учрашуви 16 май куни бўлиб ўтади. Ўйин Тошкент вақти билан соат 19:00 да бошланади.