"Вест Хэм" жамоаси ярим ҳимоячиси Матеуш Фернандеш Лондоннинг бошқа бир клуби — "Арсенал"нинг асосий трансфер нишонига айланди. Бу ҳақда таниқли инсайдер Экрем Конур хабар тарқатмоқда.
Манбанинг берган маълумотларига кўра, "канонирлар" раҳбарияти 21 ёшли португалиялик иқтидор соҳибини жамоада кутилган ўйинни намойиш эта олмаётган Кристиан Норгорга муносиб ўринбосар сифатида кўрмоқда. Агар инглиз матбуотидаги миш-мишларга ишонадиган бўлсак, "болғачилар" ўз юлдузини осонликча қўйиб юбормоқчи эмас ва унинг сотувидан камида 100 миллион евро ишлаб олишни режалаштиришмоқда.
Бундан ташқари, ёш хавбек учун курашда фақатгина "Арсенал" эмас, балки Европанинг гранд клублари — "ПСЖ", Мадриднинг "Атлетико" ҳамда "Манчестер Юнайтед" жамоалари ҳам жиддий қизиқиш билдирмоқда.
Маълумот ўрнида, Матеуш Фернандеш жорий мавсумда "Вест Хэм" либосида барча турнирларда 40 та учрашувда майдонга тушиб, ўз ҳисобига 5 та гол ва 4 та голли узатмани ёздириб қўйишга улгурди.
