Испания чемпионатининг якуний турида кураш нафақат еврокубоклар ва лигада жон сақлаб қолиш, балки телетрансляция ҳуқуқларидан келадиган миллионлаб евролар учун ҳам кечади. Marca портали жадвалдаги эгалланган ўринга қараб жамоаларга тегадиган тахминий суммаларни ҳисоблаб чиқди. Ҳисоб-китоблар учун сўнгги расмий маълумотлар асос қилиб олинган.

«Барселона» аллақачон чемпионликни қўлга киритди ва у энг катта улуш — 54,9 миллион евро олади. Иккинчи ўринда маррага етиб келадиган «Реал»га тахминан 48,4 миллион евро ажратилади. Учинчи ўрин ва қарийб 42 миллион евро учун эса «Атлетико» ва «Вильярреал» ўзаро кураш олиб боради.

Бошқа ўринлар учун тўловлар қуйидагича:

• 4-ўрин — 35,53 миллион евро

• 5-ўрин — 29,07 миллион евро

• 6-ўрин — 22,61 миллион евро

• 7-ўрин — 16,15 миллион евро

• 8-ўрин — 11,30 миллион евро

Бундан пастки ўринларни эгаллаган жамоалар 9 миллиондан 800 минг еврогача маблағ ишлаб топадилар.

Тўловлар клубларга дарҳол берилмайди: сумма маълум бир схема бўйича 5 та мавсумга тақсимланади. Шундай қилиб, телекўрсатувлардан келадиган даромадлар нафақат жорий натижага, балки клубнинг ўтган йиллардаги барқарорлигига ҳам боғлиқ бўлади.