Испания терма жамоасининг собиқ дарвозабони Сантьяго Канисарес жамоанинг янги сардори ҳақида гапира туриб, «Реал Мадрид» вингери Винисиус Жуниорни хулқ-атвори учун танқид қилди.

Ҳимоячи Даниэль Карвахаль мавсум якунида «Мадрид»ни тарк этмоқда. Унинг ўрнига ярим ҳимоячи Федерико Вальверде янги сардорга айланиши кутиляпти. Винисиус эса вице-сардорлардан бири бўлиб қолади.

«Вальверде — ҳақиқий профессионал, лекин у етакчи (лидер) эмас. У бошқаларни руҳлантира оладиган ёки муаммоларни ҳал қиладиганлар сирасидан эмас.

Винисиуснинг ўзини тутиши эса «Реал» сардори қандай бўлиши кераклиги ҳақидаги тушунчага мутлақо зиддир. Сардор жиддийлик, юқори класс ва вазминлик намойиш этиши лозим, унда эса бу фазилатлар йўқ.

Модрич, Кроос ва Карвахаль борлигида «Реал» кийиниш хонаси бутунлай бошқача эди», — деди «Реал» академияси тарбияланувчиси ҳисобланган Канисарес.