«Барселона» ҳужумчиси Роберт Левандовски ўзига туҳмат қилган собиқ агенти устидан очилган суд органида ғалаба қозонди.

Сезари Кухарски аввалроқ берган интервьюларидан бирида «Сиз кимларни жиноий гуруҳ деб атаяпсиз?» деган саволга: «Прокуратура, Сементковски, Левандовски ва уларнинг бутун жамоасини. Менинг фикримча, уларнинг қилган ишлари уюшган жиноий гуруҳ тоифасига киради», — деб жавоб берган эди. Ушбу сўзлардан сўнг польшалик футболчининг адвокати Томаш Сементковски судга мурожаат қилган.

Агент қўйилган олтита банддан тўрттаси бўйича айбдор деб топилди. Энди Кухарски суд харажатларини қоплаши, 90 000 злотий (21 170 евро) миқдорида жарима тўлаши ҳамда яна 100 000 злотийни (23 522 евро) хайрия жамғармасига ўтказиб бериши шарт.