«Атлетико» Марк Кукурельяни сотиб олишга қизиқиш билдирмоқда.
«Челси» ҳимоячиси мадридликларнинг мудофаа чизиғини кучайтириш йўлидаги асосий трансфер нишонига айланди. Шунингдек, Испания клуби марказий ҳимоячи ҳам сотиб олмоқчи, бироқ бу иш иккинчи даражали режа сифатида (маблағ ортсагина) амалга оширилади. Чунки Кукурельянинг трансфери учун анчагина йирик сумма сарфланишига тўғри келади.
Маркнинг Англиядаги беш мавсумдан сўнг яна Испанияга қайтиш истаги борлиги «Атлетико»га ушбу келишувни муваффақиятли якунлаш борасида умид бағишламоқда. Бироқ, бу ерда иккита муҳим омил мавжуд: биринчидан, 27 ёшли футболчига «Барселона» ҳам даъвогарлик қилмоқда, иккинчидан эса бўлажак ЖЧ-2026 мусобақасидан сўнг унинг трансфер нархи янада кўтарилиб кетиши мумкин. Бундан ташқари, Хаби Алонсонинг «Челси» бош мураббийлигига келиши ҳам вазиятнинг ўзгаришига таъсир кўрсатиши кутилмоқда.
