Франциянинг «Париж» клуби президенти Антуан Арно келажакда Юрген Клоппни ўз жамоаси бош мураббийи сифатида кўришни истайди. Бу ҳақда RMC Sport хабар бермоқда.
Раҳбарият жамоани шу йилнинг февраль ойида қабул қилиб олган ва натижалар ҳамда ўйин сифатини сезиларли даражада яхшилашга муваффақ бўлган амалдаги бош мураббий Антуан Комбуарени олиб қолмоқчи. Бироқ 62 ёшли мутахассиснинг соғлиғида муаммолар бор ва бу унинг кейинги фаолиятига халақит бериши мумкин.
«Агар биз Чемпионлар Лигасига йўлланма олсак, Юрген Клоппни жамоамизни бошқаришга кўндиришни истардим. Ҳамма Клопп ҳақида орзу қилади. Аммо бу яқин йиллар ичида содир бўладиган воқелик эмас — балки уч, тўрт ёки беш йил ҳақида гап кетаётгандир», — деди Арно.
Узоқ йиллар давомида қуйи лигаларда юрган «Париж» клуби Франция чемпионати жорий мавсумини ўн биринчи ўринда якунлади.
