«Вильярреал» қанот ҳимоячиси Альфонсо Педраса жорий мавсум якунида Испания клубини тарк этади. Бу ҳақдаги тегишли маълумот жамоа матбуот хизмати томонидан расмий сайтда эълон қилинди.
Педраса 2011 йилдан буён «Вильярреал» шарафини ҳимоя қилиб келмоқда — ўшанда у «сариқ сув ости кемаси»нинг клуб академиясига келиб қўшилган эди. Испания клуби таркибида 30 ёшли футболчи 234 та учрашувда майдонга тушиб, 13 та гол урди ва 19 та голли узатмани амалга оширди. 2021 йилда Педраса жамоа билан биргаликда Европа лигаси совринини қўлга киритган.
«Вильярреал» Испания чемпионати якуниланишига бир тур қолганда 69 очко жамғарган ҳолда турнир жадвалида учинчи ўринни эгаллаб турибди.
