Англиянинг «Челси» клуби ҳимоячиси Йоррел Хато 2025 йилнинг ёзида Нидерландиянинг «Аякс» клубидан кўчиб ўтганидан кейинги жамоага мослашиш (адаптация) жараёни ҳақида гапирди.

«Агар дастлабки бир неча ой осон кечди десам, ёлғон гапирган бўламан, чунки ундай бўлмади. Бу жуда қийин давр эди, аммо мавсумнинг иккинчи ярмида сиз менинг энг яхши томонларимни кўрдингиз. Мен ўз фазилатларимни — «Аякс»да намойиш этган ўйинимни кўрсата олдим. Мен сезиларли даражада ўсдим, жумладан, ўзимга бўлган ишончим ҳам ортди, айнан шу сабабли ҳозир майдонга тушяпман», — дея Хатонинг сўзларини келтиради «Челси» расмий сайти.

Англия Премьер-лигасининг жорий мавсумида 20 ёшли Йоррел Хато 21 та учрашувда майдонга тушди. Шунингдек, унинг ҳисобида Чемпионлар лигасида 4 та ўйин бор. Англия Кубогида ҳимоячи 5 та баҳсда қатнашиб, 2 та гол урди, Англия лига Кубогида эса 5 та учрашувда майдонга тушиб, 1 та голли узатмани амалга оширди.