«Челси» ярим ҳимоячиси Энцо Фернандес Аргентина терма жамоасидаги шериги Кристиан Ромерони ўз клубида кўришни истамоқда. «Тоттенхэм» сардори, ҳатто «шпорлар» Премьер-лигадаги ўрнини сақлаб қолишса ҳам, келаётган ёзда жамоасини ўзгартириши мумкин.
Transfer News Live нашри берган маълумотларга кўра, Фернандес «Челси» раҳбариятидан ёзги трансфер ойнасида Ромерони ўз томонларига оғдириб олишга ҳаракат қилишни илтимос қилган. Ярим ҳимоячи бу сўровни «аристократлар» билан шартномасини узайтириш бўйича олиб борилаётган музокаралар вақтида илгари сурган.
Transfermarkt портали Кристиан Ромеронинг трансфер қийматини 50 миллион еврога баҳоламоқда. Шунингдек, ОАВдаги миш-мишларга кўра, 26 ёшли марказий ҳимоячининг хизматларига «Барселона» ва Мадриднинг «Атлетико» клублари томонидан ҳам қизиқишлар бор.
