«Ливерпуль» бош мураббийи Арне Слот мавсумнинг «Энфилд»даги сўнгги ўйини Муҳаммад Салоҳ учун хайрлашув учрашуви бўлиши ёки йўқлиги ҳақидаги саволга жавоб беришни истамади.

«Мен ҳеч қачон таркиб танлови ҳақида гапирмайман», — дея мураббийнинг сўзларидан иқтибос келтиради BBC.

Салоҳнинг «Ливерпуль» ўйин услуби ҳақидаги оммавий баёнотларидан сўнг вазият кескинлашган эди. Слот буни низо даражасига кўтармасликка ҳаракат қилди:

«Менинг нимани ҳис қилаётганим у қадар муҳим эмас. Муҳими — Чемпионлар Лигасига йўлланма олиш ва жамоани тўғри тайёрлашдир. Мен ёзда ва келаси мавсумда жамоани ривожлантириш йўлини топишим ҳамда ўзимга ёқадиган футболни ўйнатишим керак».

24 май куни «Ливерпуль» ўз майдонида «Брентфорд»ни қабул қилади. Жамоалар АПЛ турнир жадвалида тегишлича бешинчи ва тўққизинчи ўринларни эгаллаб туришибди.