«Ливерпуль» ярим ҳимоячиси Флориан Вирц жамоадоши Муҳаммад Салоҳнинг ижтимоий тармоқлардаги яқинда эълон қилган постига ўз муносабатини билдирди.

Мисрлик ҳужумчи «Ливерпуль»ни рақиблар қўрқадиган даҳшатли ҳужумкор жамоа сифатида яна кўришни исташини таъкидлаган эди.

«Салоҳ клубни аллақачон жуда яхши билади. У ҳалол йигит, шунинг учун ўзи ўйлаганини айтади. Бу табиий ҳол. Агар истаса, фикрини эркин билдириш ҳуқуқига эга бўлиши керак. Албатта, бу барчамиз, жумладан, Салоҳ учун ҳам қийин мавсум бўлди. Менимча, унинг сўзлари атрофида ҳаддан ташқари кўп шов-шув кўтарилди. У ҳеч кимни айбламоқчи эмасди. Унинг баёнотларини тўлиқ қўллаб-қувватлайман, демаяпман, лекин унинг менталитети, воқеаларга қараши ва ишлаш услуби менга ёқади. У кўп нарсани кўрган, шунинг учун уни тинглаш керак. Одамлар бошқа ўйинчиларнинг «лайк»лари билан боғлиқ воқеани ҳаддан ташқари бўрттириб юборишди. Менимча, у шунчаки клубдаги барчани руҳлантириб, уйғотиб қўймоқчи бўлган холос», — дея журналист Жеймс Пирснинг сўзларидан иқтибос келтиради Вирц.

Эслатиб ўтамиз, Муҳаммад Салоҳ мавсум якунида «қизиллар» сафини тарк этади.