Ярим ҳимоячи Леон Горецка кетиш олдидан ўтказилган сўнгги ўйинидан сўнг клубнинг келажаги ҳақида фикр билдирди. Шанба куни Мюнхенликлар Германия Кубоги финалида Кейннинг хет-триги эвазига «Штутгарт»ни мағлуб этиб (3:0), совринни қўлга киритишди. Горецка учрашувнинг энг сўнгги дақиқаларида майдонга тушди.
«Ишончим комил, эртами-кечми «Бавария» Чемпионлар лигасида ғолиб чиқади, агар аксарият футболчилар ва айниқса мураббий ҳеч қаерга кетмаса. Мен уларга энг яхши тилакларимни тилайман», — деди 31 ёшли хавбек ўйиндан кейинги интервьюсида.
Леон Горецка саккиз йил давомида Бундеслига гранди рангларини ҳимоя қилди. Футболчининг муддати тугаётган шартномаси узайтирилмади, тез орада у расман эркин агентга айланади.
