«Рома» ҳужумчиси Пауло Дибала клубда қолишга қарор қилди. Аргентиналик футболчининг амалдаги шартномаси келгуси ойда якунига етади, бироқ томонлар янги битимни имзолаш арафасида турибди, деб хабар беради журналист Николо Скира.

Шартнома деярли тайёр. Келишув 2028 йилгача мўлжалланган бўлиб, футболчининг йиллик маоши бонусларни ҳисобга олмаганда 2,5 миллион еврони ташкил этади.

Пауло Дибала 2022 йилнинг ёзидан буён «Рома» сафида тўп суриб келмоқда. Якунланган мавсумда ҳужумчи жами 27 та ўйинда майдонга тушиб, 3 та гол ва 8 та голли узатмага муаллифлик қилди.

Эслатиб ўтамиз, аввалроқ матбуотда 32 ёшли футболчининг Аргентинага қайтиши мумкинлиги ҳақида хабарлар тарқалган эди.