«Бавария» ҳужумкор ярим ҳимоячиси Леннарт Карл бўлажак Жаҳон чемпионати учун Германия терма жамоаси қайдномасидан жой олди. 18 ёшли футболчи терма жамоадаги дебютини яқиндагина — жорий йилнинг март ойида ўтказган эди.

Журналистлар бош мураббий Юлиан Нагельсманндан вундеркиндни мундиал баҳсларида асосий таркибда кўриш мумкинми, деб сўрашди.

«Кўп нарса унинг яқин ҳафталарда ўзини қандай кўрсатишига боғлиқ. У терма жамоага келиши билан дарҳол ўзини кўрсатди ва яхши таассурот қолдирди. Мен унинг ҳужумнинг ўнг қанотида ҳам, ҳужумчи ортида марказда ҳам бирдек фойдали ўйнай олишига ишонаман. Асосий таркибда майдонга тушадими ёки йўқ — кўрамиз, буни у билан шахсан муҳокама қиламан. У ўз ўйини билан тайёр эканини исботлаши керак», – деди Нагельсманн матбуот анжуманида.

Германия терма жамоаси Жаҳон чемпионатида Кюрасао, Кот-д’Ивуар ва Эквадор терма жамоалари билан бир гуруҳдан ўрин олган.