«Ливерпуль»нинг чап қанот ҳимоячиси Эндрю Робертсон фаолиятини Англия Премьер-лигасининг бошқа бир клуби – «Тоттенхэм»да давом эттиради. «Шпорлар» узоқ вақт давомида шотландиялик футболчи учун асосий даъвогар бўлиб келишган, бироқ сўнгги паллада «Ювентус» уни ўз сафига қўшиб олмоқчи бўлганди.

Журналист Фабрицио Романонинг маълум қилишича, 32 ёшли футболчи «кекса синьора»нинг таклифини рад этди. Бунга сабаб, у «Тоттенхэм» билан аллақачон келишиб олгани ва берган ваъдасини бузишни истамаганидир.

Эндрю Робертсон «Ливерпуль» сафида тўққиз йил давомида тўп сурди. У «қизиллар» таркибида барча турнирларда жами 378 та ўйинда майдонга тушган, икки карра Англия чемпиони бўлган ва бир марта Чемпионлар лигасида зафар қучган. «Тоттенхэм» эса жорий мавсумни 17-ўринда якунлаб, АПЛдаги ўрнини сақлаб қолди.