Давиде Анчелотти Франциянинг «Лилль» клуби янги бош мураббийи бўлади. Marca нашри хабарига кўра, томонлар келишувга эришиб бўлишган. Энди фақат клубнинг амалдаги мураббийи Бруно Женезио кетгани ҳақидаги расмий баёнотни кутиш қолди.
Карло Анчелоттининг ўғли 2021 йилдан 2025 йилгача «Реал»да отасига ёрдамчи мураббийлик қилган эди. Шундан сўнг у Бразилиянинг «Ботафого» клубида бош мураббий сифатида ишлади ва бир вақтнинг ўзида Бразилия терма жамоасида ҳам отасининг штабида фаолият юритди. Энди эса Давиде яна Европа футболига қайтмоқда.
«Лилль» якунланган мавсумни Франция чемпионатида «ПСЖ» ва «Ланс»дан кейин учинчи ўринда якунлади. Таъкидлаш жоизки, «Лилль» сўнгги йилларда «ПСЖ»нинг гегемониясини тўхтата олган ягона клуб бўлиб, 2020/21 йилги мавсумда чемпионликни қўлга киритган эди.
