Мюнхеннинг «Бавария» клуби Энтони Гордон билан музокаралар муваффақиятсизликка учраганидан сўнг, «Борнмут»нинг 19 ёшли ҳужумчиси Эли Жуниор Крупига эътиборини қаратди. Бу ҳақда «Goal» портали хабар бермоқда.
Немис клуби жаҳон футболи афсонаси Тьерри Анри томонидан юқори баҳоланган ёш франциялик иқтидор соҳибини яқиндан кузатмоқда.
Франция ёшлар терма жамоасига мураббийлик қилган даврида Анри ўша пайтда 16 ёшда бўлган Крупини жамоага чақиришни режалаштирган эди. Анри бу борада шундай деганди: «Бундай истеъдод ва қатъиятга эга ўйинчини кўрганимда, унинг неча ёшда экани мен учун муҳим эмас».
Манбага кўра, Крупининг трансфери «Бавария»га 80 миллион еврога тушиши мумкин. Бир нечта позицияда ўйнай оладиган футболчи ўтган мавсумда 33 та ўйинда 13 та гол уриб, АПЛда ўзини кўрсатишга улгурди.
Аввалроқ у Франциянинг «Лорьян» клубига 22 та гол уриш орқали юқори дивизионга қайтишга ёрдам берган эди. «Бавария» Луис Диас билан рақобатни кучайтириш ва Харри Кейнга ўринбосар бўла оладиган универсал ҳужумкор ўйинчи қидирмоқда. Музокаралар яқин вақт ичида фаоллашиши мумкин. Ушбу футболчи учун «Манчестер Сити», «Арсенал» ва «Барселона» клублари ҳам кураш олиб бормоқда.
