Таниқли инсайдер Джеймс Пирснинг берган маълумотларига кўра, “Ливерпуль” ҳимоячиси Жо Гомес катта эҳтимол билан келаси мавсумни ҳам Мерсисайд клуби сафида ўтказади.
Яқиндагина “Энфилд”даги ўзининг 11-мавсумини якунлаган Гомес айни пайтда жамоа таркибида энг узоқ вақтдан бери тўп сураётган футболчи ҳисобланади. Унинг амалдаги шартномаси тугашига яна бир йил вақт қолган.
29 ёшли футболчига аввалги трансфер ойналарида ҳам бошқа клублар томонидан жиддий қизиқишлар бўлган эди, бироқ у ҳар сафар “Ливерпуль”да қолишни афзал кўрган. Жо Гомес шартномасининг сўнгги йилини ҳам жамоада ўтказиши кутилмоқда, аммо ундан кейинги узоқ муддатли келажаги ҳозирча номаълум бўлиб турибди.
Гомеснинг тез-тез жароҳат олишга мойиллигига қарамай, таркибда қолиши жамоа ҳимоя чизиғидаги рақобатни сақлаб қолиш учун муҳим. Айниқса, “Ливерпуль”да беш йил давомида тўп сурган Ибраима Конатенинг шу ёзда эркин агент сифатида кетиши кутилаётган бир пайтда, Гомеснинг тажрибаси клуб учун қўл келиши айтилмоқда.
