Таниқли журналист Джанлуиджи Лонгарининг хабар беришича, “Монако” клуби раҳбарияти бир йўла иккита йирик келишувни якунлаш мақсадида суперагент Жорже Мендеш билан учрашув ўтказди.
Князлик клуби Себастьен Поконьоли ўрнига Филиппе Луисни жамоанинг янги бош мураббийи этиб тайинлашни режалаштирмоқда. Томонлар ўртасидаги музокаралар якуний босқичга кирган.
Бундан ташқари, “Монако” ўтган мавсумни жамоада ижара асосида ўтказган Ансу Фатининг трансфер ҳуқуқини “Барселона”дан тўлиқ сотиб олмоқчи. Хабарда айтилишича, клуб футболчининг шартномасида кўрсатилган 11 миллион евролик сотиб олиш бандини фаоллаштиришга қарор қилган.
Эслатиб ўтамиз, испаниялик ҳужумчи ортда қолган мавсумда “Монако” либосида барча турнирларда жами 12 та гол уришга муваффақ бўлган ва ўз ўйини билан клуб раҳбариятида ижобий таассурот қолдирган эди.
