«Монако» «Барселона» ярим ҳимоячиси Марк Касадо билан ўз таркибини кучайтиради. Бу ҳақдаги янгилик билан журналист Мигель Бласкес ижтимоий тармоқдаги саҳифасида бўлишди.
Манбага кўра, трансфер 95 фоизга якунланган. Монако клуби янги ўйинчи учун 18 миллион евро тўлайди, бонус тўловлари билан эса келишув суммаси 23 миллион еврога етиши мумкин. Шунингдек, каталонияликлар Касадонинг келажакдаги трансфер қийматининг 20 фоизини олиш ҳуқуқига эга бўлишади.
Касадо 23 ёшда бўлиб, у «Барселона» тарбияланувчиси ҳисобланади. Шу боис, бўлажак трансфер унинг клуб фаолиятидаги илк кўчиши бўлади. Якунланган мавсумда Касадо «Барса» сафида барча турнирларда 34 та ўйинда майдонга тушган ва битта голли узатмани амалга оширган. Transfermarkt портали каталонияликларнинг ёш иқтидорини 20 миллион еврога баҳоламоқда.
