«Вест Хэм» вингери Жаррод Боуэн шу ёзда клубни ўзгартириши мумкин. «The Guardian» нашрига кўра, футболчининг хизматларига «Манчестер Юнайтед» қизиқиш билдирмоқда. «Болғачилар» ўз ўйинчисини 50 миллион фунт стерлингга баҳоламоқда, бироқ келишувга эришиш учун 40 миллион фунт стерлинг миқдоридаги таклиф етарли бўлиши мумкин деб ҳисобланмоқда.

Жаррод Боуэн 2020 йилда «Халл Сити»дан 21 миллион евро эвазига «Вест Хэм»га ўтган эди. Унинг Лондон клуби билан тузган шартномаси 2030 йилнинг 30 июнига қадар мўлжалланган. 2025/26 йилги мавсумда вингер «болғачилар» сафида барча мусобақаларда 42 та учрашув ўтказиб, 11 та гол урган ва 12 та голли узатмани амалга оширган.