«Галатасарой» ва «Бешиктош» клублари ЦСКА ярим ҳимоячиси Матвей Кислякни трансфер қилишдан манфаатдор, деб хабар бермоқда туркиялик журналист Осман Алтунтерим.
Май ойида 20 ёшли футболчига «ПСЖ» томонидан ҳам қизиқиш борлиги ҳақида маълумотлар пайдо бўлган эди.
Матвей — ЦСКА клуби тарбияланувчиси бўлиб, 2023 йилдан буён жамоанинг асосий таркибида тўп суриб келмоқда. 2025/26 йилги мавсумда ярим ҳимоячи барча турнирларда 42 та ўйинда майдонга тушиб, 8 та гол ва 8 та голли узатмага муаллифлик қилди.
Кислякнинг ЦСКА билан шартномаси 2029 йилнинг ёзига қадар мўлжалланган. Transfermarkt портали футболчининг трансфер баҳосини 25 миллион еврога баҳоламоқда.
