«Реал» президенти Флорентино Перес клубни сотиш нияти йўқлигини, чунки у жамоа учун фақат энг яхшисини хоҳлашини маълум қилди.
«Ҳозирда «Реал»нинг қиймати 10 миллиард еврони ташкил этади. Мен 2000 йилда клубга илк бор келган пайтимда, биз ҳатто футболчиларнинг маошини ҳам тўлай олмас эдик. Одамлар мени 80 ёшда эканимни ва сайловларда қатнашмасдан, дам олишим кераклигини айтишяптими? Мен ҳали кичкина бола бўлган пайтимдаёқ отам «Реал»ни қалбимга жо қилган, шунинг учун мен ушбу клубга ёрдам беришни ўз бурчим деб ҳисоблайман.
Биз ҳар доим ҳам ғалаба қозона олмаймиз, лекин мен жуда кўп — 66 та соврин ютиб олдим (футбол ва баскетбол жамоалари билан биргаликда). «Реал» билан ҳеч ким менчалик кўп соврин қўлга киритмаган.
Одамлар мени клубни сотмоқчи деб айтишяптими? Бу шунчаки уйдирма гап. Мен ушбу клуб фақатгина унинг расмий аъзоларига (сосиос) тегишли бўлишини хоҳлайман. Улар «Реал»га шунчаки қоғозда эмас, балки амалда эгалик қилишларини истайман. Бу бўйича референдум ўтказилади ва улар овоз беришади», — дея Переснинг сўзларини келтиради Diario AS нашри.
«Реал» президенти сайловлари шу якшанба, 7 июнь куни бўлиб ўтади.
2025/26 йилги мавсумда «Реал» 86 очко жамғариб, Испания чемпионатида иккинчи ўринни эгаллади. Турнир ғолиблигини эса 94 очко билан «Барселона» қўлга киритди.
