Лондоннинг «Арсенал» клубида май ойининг энг яхши футболчиси аниқланди. Ушбу номга дарвозабон Давид Райя лойиқ кўрилди. Бу ҳақдаги тегишли маълумот «канонирлар»нинг расмий сайтида эълон қилинди.
Ўтган ойда испаниялик посбон барча мусобақаларда 5 та ўйинда майдонга тушди ва ўз дарвозасидан бор-йўғи битта тўп олиб чиқди (Чемпионлар лигаси финалида «ПСЖ»дан).
Якунланган мавсумда Райя умумий ҳисобда 51 та учрашувда майдонга тушди. Шулардан 28 тасида дарвозабон ўз воротаси дахлсизлигини сақлаб қолди. Испаниялик посбоннинг ишончли ўйини «Арсенал»га 2004 йилдан буён илк бор Англия чемпиони бўлишга ёрдам берди.
Ҳозирги вақтда Райя Испания терма жамоаси сафида Жаҳон чемпионатида иштирок этишга тайёргарлик кўрмоқда. Мусобақанинг гуруҳ босқичида унинг жамоаси Кабо-Верде, Саудия Арабистони ва Уругвай терма жамоаларига қарши баҳс олиб боради.
