Футбол бўйича АҚШ терма жамоаси бош мураббийи Маурисио Почеттино ФИФАнинг 2026 йилги Жаҳон чемпионатидаги барча ўйинлар пайтида сув ичиш учун мажбурий танаффуслар жорий этиш ҳақидаги қарорини танқид қилди.
Айни пайтда ўтаётган турнирда, об-ҳаво шароитидан қатъи назар, ҳар бир бўлимда уч дақиқалик тўхталишлар кўзда тутилган. ФИФА ушбу янгиликни расман футболчиларнинг соғлиғига ғамхўрлик қилиш билан изоҳламоқда, бироқ бу қоида аллақачон ўйинчилар, мураббийлар ва мухлислар ўртасида баҳс-мунозараларга сабаб бўлди.
Почеттино бундай амалиётни қўллаб-қувватламаслигини тан олди.
«Бу менга ёқмаяпти. Мен ушбу танаффуслар фақатгина об-ҳаво шароити ҳақиқатан ҳам ўта оғир (экстремал) бўлгандагина зарур деб ҳисоблайман. Аммо об-ҳаво яхши бўлса, бунга мутлақо эҳтиёж йўқ», — дея мутахассиснинг сўзларидан иқтибос келтиради Independent нашри.
Бундай мажбурий тўхталишлар телекомпанияларга ўйин пайтида қўшимча реклама жойлаштириш имконини беради. Янги қоида, шунингдек, ўйин динамикасига (суръатига) салбий таъсир кўрсатаётгани сабабли ҳам танқидларга учради. Танаффус пайтида футболчилар мураббийлардан кўрсатмалар олишмоқда, стадиондаги томошабинлар эса чалғиб, егулик ва ичимликлар харид қилишга тушиб кетишмоқда.
