Испания терма жамоаси бош мураббийи Луис де ла Фуэнте миллий жамоа ярим ҳимоячиси Ламин Ямал аъло даражадаги спорт формасида эканлигини ва испанларнинг 2026 йилги Жаҳон чемпионатидаги илк ўйинида майдонга тушиши мумкинлигини айтди.
18 ёшли вингер 22 апрель куни Ла Лиганинг 33-туридан ўрин олган «Сельта»га қарши ўйинда (1:0) жароҳат олган эди. У 11 июнь куни Испания терма жамоасининг умумий гуруҳ машғулотларига қўшилди.
«Барча футболчилар яхши ҳолатда, айниқса Ламин. Уни иккинчи бўлимда майдонга туширишни режалаштиряпманми? Буни ўзим ҳал қилишимга қўйиб беринг. Ламин бенуқсон спорт формасида ва айнан биз хоҳлаган вақтда етиб келди. Ҳозирнинг ўзидаёқ айта оламанки, барча футболчилар ўйинга тайёр. Кимдир, балки, бутун учрашувни ўтказа олмас, лекин мен алоҳида таъкидлашни истардим: энг яхши янгилик — барча футболчилар сафда», — дея мураббийнинг сўзларини келтиради AS нашри.
Испания терма жамоаси 15 июнь куни Жаҳон чемпионати доирасида Кабо-Вердега қарши майдонга тушади. Испанлар 21 июнь куни Саудия Арабистони билан, 27 июнь куни эса Уругвай билан куч синашишади.
