Мадриднинг «Реал» клуби марказий ҳимоячиси Рауль Асенсио жамоа янги бош мураббий Жозе Моуриньо қўл остида катта муваффақиятларга эриша олади деб ҳисоблайди.

Португалиялик мутахассиснинг тайинлангани ҳақида июнь ойи бошида эълон қилинган эди. У истеъфога чиққан Альваро Арбелоанинг ўрнини эгаллайди.

«Янги мавсумда Ла Лигада ғолиб чиқа оламизми? Ҳа, албатта! Ўз вақтида унинг қўл остида «Реал» очко йиғиш бўйича рекорд ўрнатган эди. Биз соврин учун курашамиз.

Болалигимда Моуриньо жамоани қандай ўзгартирганини кузатганман. У футболчиларга характер ва кучли иштиёқни сингдира олган. Жозе билан иш бошлашни интиқлик билан кутяпман», — деди Асенсио ElDesmarque нашрига берган интервьюсида.

Эслатиб ўтамиз, Жозе Моуриньо ўзининг дастлабки мураббийлик даврида, 2010 йилдан 2013 йилгача «қаймоқранглилар»ни бошқарган эди.