Мадриднинг «Реал» клуби собиқ ҳужумчиси Гарет Бэйл Жозе Моуриньонинг «қаймоқранглилар» бош мураббийи сифатидаги истиқболларини баҳолади. Уэльслик футболчи 2020/21 йилги мавсумда «Тоттенхэм»да португалиялик мутахассис қўл остида тўп сурган.

«У футболчиларни фақатгина бор кучларини ишга солишлари учун руҳлантира олади. Жозе ҳар бир ўйинчини тушунишга ва уларни ишлашга мажбур қилиш учун қўлидан келган барча ишни қилишга ҳаракат қилади. Баъзан бу ОАВдаги баёнот орқали, баъзан эса шунчаки елкага дўстона уриб қўйиш билан амалга ошиши мумкин.

Жозе «Реал»да ишлаган, у ердаги динамикани тушунади ва ҳамма нарса қандай тузилганини билади. У натижага эришишга ёрдам берадиган режа ишлаб чиқади», — дея Бэйлнинг сўзларини келтиради The Athletic.