Бир йўла бир нечта клуб, жумладан «Тоттенхэм» ҳам «Наполи»дан 23 ёшли ярим ҳимоячи Антонио Вергарани сотиб олишга уриниб кўрди. Бу ҳақда инсайдер Николо Скира маълум қилди.

Манбанинг хабар беришича, неаполликлар Англия Премьер-лигаси вакиллари — «Тоттенхэм» ва «Борнмут» клубларидан келиб тушган таклифларни рад этган. Бундан ташқари, клуб Вергарани А Сериянинг бошқа вакиллари — «Комо» ва «Аталанта»га қўйиб юборишни ҳам истамаган.

«Наполи» ўз ярим ҳимоячисини таркибда сақлаб қолмоқчи, чунки клуб уни келажакдаги янги лойиҳанинг асосий ва муҳим ўйинчиларидан бири сифатида кўрмоқда. Қайд этилишича, Италия клуби яқин орада хавбек билан амалдаги меҳнат шартномасини узайтиришни режалаштирмоқда.

Маълумот учун, Вергара — «Наполи» академияси тарбияланувчиси ҳисобланади. Ортда қолган 2025/26 йилги мавсумда футболчи барча турнирларни инобатга олган ҳолда 19 та учрашувда майдонга тушиб, 3 та гол урди ва 4 та голли узатмага муаллифлик қилди.