"Ливерпуль"нинг янги бош мураббийи Андони Ираола тайинланганидан кейин илк бор матбуот билан мулоқот қилди.

Испаниялик мутахассис мерсисайдликлар бошқарувини Арне Слот истеъфога чиқарилганидан сўнг ўз қўлига олди. Слот қўл остида жамоа Англия Премьер-лигасида чемпионлик унвонини ҳимоя қила олмаганди.

"Мен мухлисларга улар фахрлана оладиган жамоа тақдим этмоқчиман", - дея Ираоланинг сўзларини келтиради "Daily Mail".

"Мен бу улкан клуб эканлигини тушунаман. Айтган ёки қилган ҳар бир ишим қаттиқ назорат остида бўлади. Хатоларга тайёр туриш керак, аммо мен жуда эҳтиёткор бўлишни истамайман. Мен ўзлигимча қолишни ва ишимни меъёрида бажаришни хоҳлайман", - дея қўшимча қилди у.

Келаси ҳафта "Ливерпуль" АҚШ бўйлаб турнега йўл олади ва у ерда "Сандерленд", "Лидс" ва "Рексем" клубларига қарши ўртоқлик учрашувларини ўтказади.