Мюнхеннинг «Бавария» клуби янги футболчиси Исмоил Сайбари чоршанба, 15 июль куни илк бор клубнинг Зэбенер Штрасседаги базасида бўлди ва ўз таассуротлари билан ўртоқлашди. 25 ёшли марокашлик футболчи расмий ўйинда майдонга тушишни интиқлик билан кутаётганини тан олди.

«Мени «Альянц Арена» жуда қизиқтирмоқда. Мен у ерда илгари ҳеч қачон ўйнамаганман. Илк мартаси аниқ ўзгача бўлади», — дея Сайбарининг сўзларини келтиради «Бавария» матбуот хизмати.

Футболчи мюнхенликлар билан шартномани ЖЧ-2026 гуруҳ босқичидаёқ имзолаган эди, битим Нью-Йоркдаги «Бавария» офисида расмийлаштирилган. Энди у оиласи билан бирга машғулот базасига ташриф буюрди ва ходимлар билан танишди. «Бавария»нинг спорт масалалари бўйича бошқарув аъзоси Макс Эберль клуб трансфер устида мундиалдан анча аввал ишлаганини тушунтирди: «Асосий жиҳат шундаки, биз унинг қобилиятлари ҳақида билганмиз ва эрта босқичдаёқ унга аниқ истиқболни кўрсата олганмиз».

Жаҳон чемпионатида Сайбари гуруҳ босқичининг ҳар учала ўйинида — Бразилия, Шотландия ва Гаити дарвозаларига биттадан гол урди, шунингдек, 1/16 финалда Нидерландияга қарши ўйинда ҳал қилувчи пенальтини амалга оширди. 1/4 финалда Францияга қарши баҳсда жароҳати туфайли қатнаша олмади ва Марокаш турнирни тарк этди. Сайбари «Бавария» машғулотларига кейинроқ қўшилади — ҳозирда у таътилда.