Суперлиганинг 13-турида «Нефтчи» жамоаси сафарда «Сўғдиёна» устидан 5:1 ҳисобида йирик ва ишончли ғалабани қўлга киритди. Бу натижа нафақат уч очко, балки фарғоналиклар клуби ва чемпионат тарихидаги бир қатор муҳим рекордларни янгилашга хизмат қилди.

Клуб матбуот хизмати Жиззахдаги тарихий муваффақият ортида турган муҳим рақамлар ва фактларни тақдим этди:

• 19 йиллик танаффусдан кейинги 5 та гол: «Нефтчи» Ўзбекистон чемпионатлари тарихида 9-маротаба сафар ўйинида 5 ва ундан ортиқ тўп киритилган учрашувни ўтказди. Охирги марта бундай сермаҳсуллик 2006 йилнинг 23 сентябрида «Хоразм»га қарши кечган баҳсда (8:2) кузатилган эди. Орадан 19 йил-у 10 ой ўтиб, жамоа яна сафарда 5 та гол уришга эришди.

• «Сўғдиёна» майдонидаги рекорд: Жиззахдаги бу муваффақият «Нефтчи»нинг «Сўғдиёна» майдонида қозонган энг йирик ғалабасига айланди. Бунга қадар энг яхши кўрсаткич 1994 йилда қайд этилган 4:0 ҳисобидаги ғалаба эди. Орадан 32 йил ўтиб, фарғоналиклар ушбу рекордни ҳам янгилашди.

• Антирекорд қайтарилди: «Сўғдиёна» ўз майдонида ўтказилган ўйинлар тарихида бор-йўғи 7-маротаба ўз дарвозасидан 5 ва ундан ортиқ тўп олиб чиқишга мажбур бўлди.

Эътиборлиси, «Нефтчи»нинг сафардаги энг йирик (4 ва ундан ортиқ тўп фарқи билан) ғалабалари орасида айнан Жиззахда «Сўғдиёна»га қарши ўтказилган икки учрашув (1994 йилги 0:4 ва жорий мавсумдаги 1:5) алоҳида ўрин эгаллади.