«Челси»нинг янги аъзоси Максанс Лакруа Лондон клубига кўчиб ўтгани ҳақида ўз фикрларини билдириб ўтди.

«Ўйлашимча, бу мен учун энг яхши қадам бўлди, чунки бу дунёдаги энг яхши клуб. Мен Мало Гюсто, Трево Чалоба ва Бенуа Бадиашиль билан гаплашдим. Одамларнинг бу клуб ҳақида ижобий фикр билдиришлари жуда осон, чунки «Челси» катта тарихга эга. Эндиликда ушбу тарихнинг бир қисмига айланганимдан жуда фахрланаман.

Мураббий билан телефонда гаплашдим. Биз тактика ва унинг ўйинни қандай кўраётгани ҳақида суҳбатлашдик. Энг аввало, у билан футбол ҳақида шунчаки гаплашганимдан хурсанд бўлдим ва клубга нисбатан мақсадларимиз ҳамда хоҳишларимиз бир хил эканини кўрдим.

Мураббий ҳамда терма жамоадаги «Челси»да ўйнайдиган шерикларим, масалан, Мало билан гаплашганимда, улар менга бу мен ўтишим мумкин бўлган энг яхши клуб эканини айтишди. Шу сабабли «Келинг, кўп ўйлаб ўтиришим шарт эмас» деб айтдим. Бу инсонлар билан мулоқотдан сўнг ўзимга: «Бу фаолиятимдаги энг яхши олдинга ташланган қадам бўлади», дедим», — деди Лакруа «Челси» матбуот хизматига берган интервьюсида.

Эслатиб ўтамиз, Лакруа «Челси» билан 2032 йилнинг 30 июнигача мўлжалланган шартномага имзо чекди. Франциялик ҳимоячининг трансфер суммаси 61 миллион еврони (тахминан 52 млн фунт) ташкил этди.