«Галатасарай» президенти Дурсун Ўзбек «Локомотив» ярим ҳимоячиси Алексей Батраковнинг трансферида шахсан иштирок этмоқда. Туркия клуби раҳбари 21 ёшли футболчини ижарага эмас, балки тўлиқ сотиб олиш бўйича таклиф киритган. Бу ҳақда журналист Бурак Эрен X ижтимоий тармоғидаги саҳифасида хабар беради.

Манба берган маълумотларга кўра, Ўзбек Батраков билан шахсан таниш эмас, аммо трансфер сиёсатида уни «кимдир йўналтириб турмоқда».

Аввалроқ ОАВ Истанбул клуби россиялик ярим ҳимоячи учун шартномада кўрсатилган 20 миллион евро миқдоридаги товон пулини тўлашга тайёрлиги ҳақида хабар берган эди.

Батраков «Локомотив» тарбияланувчиси ҳисобланади. У Москва жамоаси сафида барча турнирларда 81 та ўйинда майдонга тушиб, 33 та гол урди ва 23 та голли узатмага муаллифлик қилди. Футболчининг клуб билан амалдаги меҳнат шартномаси 2029 йилнинг ёзигача мўлжалланган. Transfermarkt порталида келтирилган маълумотларга кўра, унинг бозор қиймати 28 миллион еврони ташкил этади.