«Шахтёр» бош мураббийи Арда Туран Донецк клуби Чемпионлар Лигасининг умумий босқичидаги уй ўйинларини қаерда ўтказиши ҳақидаги саволга изоҳ берди.
«Чемпионлар Лигаси ўйинлари ўтказиладиган келажакдаги манзил бўйича Сергей Анатольевич Палкин ёки Дарио Срнага мурожаат қилган маъқул. Локация узил-кесил тасдиқлангач, улар аниқ жавоб бера олишади.
Ҳар қандай ҳолатда ҳам, уй ўйинларимизни қаерда ўтказишимиздан қатъи назар, украиналик мухлисларни ва «Шахтёр» ишқибозларини кўришдан хурсанд бўламиз. Биз уларнинг қўллаб-қувватлашига ҳамда дунёнинг исталган нуқтасида биз учун яратиб бера оладиган ажойиб муҳитига жуда суянамиз», — деди Тураннинг сўзларини келтирган «Украинский футбол».
Аввалроқ «Шахтёр» Чемпионлар Лигаси умумий босқичидаги уй учрашувларини Лондонда ўтказиши мумкинлиги ҳақида хабар берилган эди, бироқ клуб ҳозирча бу маълумотни расман тасдиқлагани йўқ.
