«Бавария» бош мураббийи Венсан Компани Бундеслигани АПЛдан сўнг иккинчи энг кучли чемпионат деб ҳисоблайди.
«Лигалар ўртасидаги бу каби солиштиришларнинг кўпчилиги жуда оддий: молиявий имкониятларга қараш керак. АПЛ энг катта молиявий ресурсларга эга, шу сабабли у дунёдаги энг яхши лига ҳисобланади.
Мен Бундеслигани иккинчи ўринга қўйган бўлардим. Истеъдод даражасига қарайдиган бўлсак, АПЛ олдинда, чунки шунча маблағ билан жуда кўп сондаги кучли ўйинчиларни сотиб олиш мумкин. Аммо Бундеслиганинг ҳам ўз афзалликлари бор: ажойиб мухлислик маданияти ва деярли ҳар бир клубда пайдо бўладиган жуда истеъдодли футболчилар.
Ҳозирда АПЛ устунликка эга, бироқ Бундеслига — куч бўйича иккинчи лига. Бу кўплаб ажойиб ўйинчилар ва кучли жамоалар тўп сурадиган жуда қизиқарли чемпионатдир», — деди Компани.
