Миланнинг «Интер» клуби ярим ҳимоячиси Хакан Чалханўғли клубдаги келажаги ҳақидаги саволга жавоб берди.

32 ёшли футболчининг амалдаги меҳнат шартномаси кейинги йилнинг ўрталарида якунига етади. Туркиялик хавбек шартномани узайтириш бўйича музокараларга тайёр эканини тан олди.

«Менга «Интер»да ўйнаш ва Миланда яшаш ёқади. Менга ҳам, оиламга ҳам бу ерда жуда яхши. Аммо ҳамма нарса ҳам менга боғлиқ эмас. Мен клубдан қўнғироқ кутяпман. Ҳозирча музокаралар олиб борилмаяпти. Кўрамиз, нима бўларкан», – деди Чалханоглу La Gazzetta dello Sport нашрига берган интервьюсида.

Ўтган мавсумда футболчи «нерадзурри» сафида 30 та ўйинда майдонга тушиб, 12 та гол урди ва 7 маротаба жамоадошларига ассистентлик қилди.