Леон Горетцка «Бавария»ни тарк этганидан бери бир неча ҳафта ўтган бўлса-да, ҳанузгача клубсиз қолмоқда — 31 ёшли футболчи ўзига янги жамоа топганича йўқ.

Аввалроқ ярим ҳимоячи хизматларига «Барселона», «Арсенал», «Ювентус», «Милан», «Наполи» ва «Атлетико Мадрид» каби Европанинг бир қатор гранд клублари қизиқиш билдираётгани айтилган эди, бироқ ҳозиргача ҳеч қандай аниқ таклиф тушмаган.

Музокаралар тўхтаб қолганига Горетцканинг молиявий талаблари сабаб бўлиши мумкин. Хабарларга кўра, Германия терма жамоаси аъзоси йилига соф 7 миллион евро маош ҳамда тахминан 10 миллион евро миқдорида шартнома имзолаш бонусини талаб қилмоқда.

Унинг яқинда бўлиб ўтган Жаҳон чемпионатида кам ўйин амалиётига эга бўлгани ҳам трансфер бозоридаги имкониятларини оширмади. Горецка турнирда бор-йўғи уч марта майдонга тушди ва SPORT BILD хабарига кўра, ўз ролидан норози бўлган.

Ярим ҳимоячи «Чикаго Файр» клуби томонидан бўлган таклифни рад этган, чунки у Европада юқори даражада ўйнашда давом этмоқчи.

Горецканинг «Бавария» билан шартномаси мюнхенликлар сафида ўтказилган саккиз йилдан сўнг июнь ойи охирида тугади, аммо унинг кейинги манзили ноаниқлигича қолмоқда.