«Барселона» ҳимоячиси Жюль Кунде Англия Премьер-лигаси клубларининг қизиқиш доирасига тушди.

Испаниялик журналист Жерар Ромеро маълум қилишича, 27 ёшли футболчи Англия чемпионати вакилларидан таклифларга эга. Энди Кунденинг ушбу таклифларга муносабати ва келажаги бўйича қабул қиладиган қарори кутилмоқда.

«Кунде Англия лигасидан таклифлар олмоқда. Энди унинг нима қилишини кутишимиз керак. Кўрамиз, у қандай қарор қабул қилади», — деди Ромеро.

Кунде 2022 йилда «Севилья»дан «Барселона»га кўчиб ўтган. Каталония клуби 2025 йил август ойида француз ҳимоячиси билан шартномани 2030 йил 30 июнига қадар узайтирган.

Transfermarkt маълумотларига кўра, Кунденинг айни пайтдаги бозор қиймати 60 миллион еврони ташкил этмоқда. У «Барселона» таркибида асосан ўнг қанот ҳимоячиси сифатида ҳаракат қилмоқда.

Футболчининг Англия клубларидан тушган таклифлар бўйича якуний қарори ҳозирча маълум эмас.