"Тоттенхэм" дарвозабони Гульельмо Викарио яқин вақт ичида Италия чемпионатига қайтиб, "Ювентус" сафига қўшилади. Бу ҳақда таниқли инсайдер Фабрицио Романо ижтимоий тармоқларда хабар берди.
Манба маълумотига кўра, 29 ёшли голкипер Турин клубига ижара асосида ўтади. Клублар ўртасидаги келишувда футболчини кейинчалик тўлиқ сотиб олиш ҳуқуқи ҳам кўзда тутилади.
Викарио 2023 йилдан буён "Тоттенхэм" шарафини ҳимоя қилиб келмоқда. Ўтган мавсумда у барча мусобақалар доирасида 43 та учрашувда майдонга тушди ва шуларнинг 13 тасида дарвозасини дахлсиз сақлади.
Аввалроқ "Ювентус" "Астон Вилла" ва Аргентина миллий жамоаси дарвозабони Эмилиано Мартинесни харид қилиш вариантидан воз кечгани маълум бўлган эди.
