«Байер» янги мавсум олдидан жамоа сардорини алмаштиришга қарор қилди. Энди Леверкузен клубини майдонга марказий ҳимоячи Эдмонд Тапсоба сардор сифатида бошлаб тушади.
Sky Germany журналисти Флориан Плеттенберг маълумотига кўра, Буркина-Фасо миллий жамоаси аъзоси янги мавсум арафасида сардорлик боғичини қабул қилиб олган. Ҳужумчи Патрик Шик эса катта эҳтимол билан вице-сардор этиб тайинланади.
Шу тариқа, ўтган мавсумда жамоа сардорларидан бири бўлган Роберт Андрих янги иерархияда бу вазифани бажармайди. Шунингдек, 31 ёшли германиялик футболчи вице-сардорликка ҳам даъвогар эмас.
Манбага кўра, Андрихнинг Леверкузендаги келажаги ҳам ноаниқ бўлиб турибди. Клуб раҳбарияти ярим ҳимоячига ёзги трансфер ойнаси ёпилгунга қадар жамоани тарк этиши мумкинлигини маълум қилган.
Тапсобага сардорлик ишониб топширилиши унинг клубдаги мавқеи янада мустаҳкамланганини кўрсатади. 27 ёшли ҳимоячи 2020 йил январда Португалиянинг «Витория Гимарайнш» клубидан «Байер»га келиб қўшилган ва шундан буён жамоанинг асосий футболчиларидан бирига айланган.
Буркина-фасолик футболчи 2023/24 йилги тарихий мавсумда ҳам «Байер»нинг етакчиларидан бири бўлган. Ўшанда Хаби Алонсо бошчилигидаги Леверкузен жамоаси илк бор Германия чемпиони бўлган ва мамлакат кубогини ҳам қўлга киритган.
Клуб Тапсобанинг келажагини ҳам узоқ муддатга кафолатлаб қўйган. 2026 йил апрелида томонлар янги шартнома имзолади ва ҳимоячининг келишуви 2031 йил 30 июнга қадар узайтирилди. «Байер» спорт директори Симон Рольфес ўшанда Тапсобани жамоанинг мутлақ таянч футболчиларидан бири ва Бундеслиганинг энг яхши ҳимоячиларидан бири деб атаганди.
Энди Тапсоба янги мақомда нафақат «Байер» мудофаасини бошқариши, балки янгиланаётган жамоанинг майдондаги асосий етакчиларидан бири бўлиши кутилмоқда.
